القائمة الرئيسية

الصفحات

اخر الاخبار

كل ما تريد معرفته عن العلوم السياسية


العلوم سياسية باختصار هتغير من شخصيتك كتير جدا، هتعلمك ازاي تعمل بحث من أول الاسم لحد المراجع، هتعلمك ازاي تدخل المكتبة وتدور في المراجع، هتعلمك لما تسمع كلام تحلله وتفصصه كلمة كلمة، القسم هيخليك مثقف بكل معنب الكلمة ونقدر نقسم مواد علوم سياسية كالتالي..

1- فكر و نظرية سياسية : ودى من أهم المواد اللي لازم نهتم بيها لإنها بتحط الأساس النظرى زى المصطلحات و النظريات اللى نقدر نعتمد عليها فى الجانب التطبيقى. مثال على المواد دى : الفكر السياسى، النظرية السياسية، فكر سياسي عربى، أيديولوجيات، نظرية العلاقات الدولية، نظرية السياسة الخارجية.

2- نُظم سياسية : و الجانب ده بيهتم بالنظم السياسية و الأحزاب و الرأى العام و الانتخابات و فيه مواد كتير بتركز عليه زى : نظم سياسية غربية، النظم السياسية فى الوطن العربى، النظم السياسىة فى الوطن العربى. و بالتالى نقدر نقول أن المواد دى بتهتم بنظام الدولة و سماته الرئيسية و إزاى اتطور و الظروف اللى أثرت عليه.

3- العلاقات الدولية : القسم ده بقى فيه مواد كتير و بيهتم بشكل رئيسى بالعلاقات بين الدول و إيه اللى بيحكم العلاقات دى و المصالح المتبادلة و النظريات اللى بتفسر العلاقات و المصالح دى. أمثلة على المواد دى : تطور العلاقات الدولية، قضايا دولية مُعاصرة، دراسات استراتيجية.

4- المواد القانونية : القانون بيشكل جزء مهم جداً فى العلوم السياسية يعنى مثلاً على مستوى العلاقات الدولية فيه مواد زى التنظيم الدولى اللى بيهتم بالمنظمات الدولية و هيكلها و وظائفها زى الأمم المتحدة، القانون الدولى اللى بيهتم بالمعاهدات و الاتفاقيات الدولية و مصادرها و أشكالها، القانون الدستورى اللى بيهتم بالدستور و نشأته و مدى أهميته فى قيام الدولة، النظم القنصلية و الديبلوماسية اللى بتهتم بالعلاقات الديبلوماسية و القنصلية بين الدول وكيفية تطبيقها.

5- قاعات البحث : مهمتك الأساسية كطالب/ ة علوم سياسية إن أنت تقدر تعمل بحث أو ورقة بحثية فى موضوع مُعين أنت مهتم بيه من المواد اللى اتكلمنا عليها عشان كده قاعات البحث لازم تكون موجودة فى كل فصل دراسى من أول تانية و لحد سنة رابعة ( مشروع التخرج) و بالتالى المادة دى بتعلمك إزاى تفكر بشكل منهجى و منظم عشان تحدد المشكلة البحثية اللى بتشغلك و عايز تبحث فيها. ملاحظة مهمة: أن الشكل اللى أنت هتعمل بيه البحث فى الكلية مش هو نفس الشكل اللى هتعمل فيه البحث لو اشتغلت فى أى مركز بحثى بعد لما تتخرج إن شاء الله لكن هتفضل المادة دى من أهم المواد لو حبيت تكمل دراسات عُليا بالإضافة إلى إنها هتكون الأساس ليك كباحث / ة و هتعلمك إزاى تدور على المعلومة و توثقها إن فيه طُرق كتير للتوثيق.
ده لينك مواد العلوم السياسية من أول تانية لحد رابعة لو حد حب يبص عليهم مع ملاحظة أن فيه مواد اختيارية ( يعنى مجموعة مواد تختار منها واحدة بس ) : من هنـــــــــــا.

و ده لينك فيه كل مادة و نبذة مختصرة عنها : من هنـــــــــــا.
بشكل عام، درجات المادة بيتقسموا بين الأقسام دى : - امتحان الميدترم - التكليفات ( تحليل أو ترجمة) - التفاعل فى المحاضرة أو السيكشن ( لو العدد قليل ) - العروض.

طيب إيه هى مجالات الشغل لخريجى العلوم السياسية :

1- وزارة الخارجية : حلم كتير من الشباب أنهم يدخلوا الخارجية، خلينا نقول ملاحظة مهمة ممكن كتير مننا مش عارفها و هى أن الخارجية مش مقتصرة على خريجى العلوم السياسية إنها بتعتمد على معايير محددة و اللى تتوافر فيه المعايير دى يقدر يدخل الخارجية طبعاً. من أكتر الكليات اللى بتدخل الكليات اللى بتدخل الخارجية كلية الألسن بسبب موضوع اللغة و بالتالى لو قدرت تشتغل على نفسك من دلوقتى فى تعلم اللغات بالإضافة إلى إنك ليك الأفضلية إن الامتحان هيكون فى الحاجات اللى أنت درستها فعلاً زى القضايا الدولية و القانون الدولى، الحاجات دى هتزود من احتمالات قبولك لكن مش 100% هتدخل الخارجية بسببها لأن فيه معايير تانية طبعاً

2- المراكز البحثية : و دى للى مهتم يكمل فى المجال البحثى و بالأخص العلاقات الدولية زى مركز الأهرام للدراسات السياسية و الاستراتيجية بالإضافة للمراكز البحثية اللى برة مصر زى الولايات المتحدة.

3- منظمات المجتمع المدنى : و دى للى حابب يشتغل على الأرض أكتر و بيركز على تنمية المجتمع و دور الجمعيات الخيرية لكن للأسف عليها تضييق شديد من الدولة خلال الفترة دى لكن لو حاجة برة زى المنظمات الخاصة باللاجئين هتكون كويسة طبعاً.

4- البنوك والشركات المختلفة


5- إكمال الدراسة :
سواءاً فى الكلية أو أى كلية فى مصر أو البحث عن منحة جزئية أو كلية فى الخارج و بالتالى لو ناوى على منحة لازم تهتم بالتقدير و اللغة الإنجليزية و الأعمال التطوعية. وبشكل عام لازم تهتم بالحاجت دى سواءاً للمنح أو الشغل : التقدير، اللغة الإنجليزية و لغات أخرى هيكون كويس كبعاً، الكمبيوتر و خاصةً الأوفيس، الأنشطة الطلابية و الأعمال التطوعية.

Coursera - موقع لتوفير الكورسات اونلاين - وبيقدم الكورسين دول و هيفيدوا جداً طلبة العلوم السياسية :
1- كورس عن ازاي تعمل استطلاع رأي للعلوم الإجتماعية اسمه "Questionnaire Design for Social Surveys" وده ببساطه بيساعدك في الأبحاث بتاعتك وده اللينك : من هنـــــــــــا.
2- كورس عن الدبلوماسية والعلاقات الدولية: "Global Diplomacy – Diplomacy in the Modern World" ممكن تتطلعه عليه من خلال اللينك ده : من هنـــــــــــا.

اخيرا :
كان فى أستاذ فاضل بيقولنا فى إحدى المحاضرات :
اللى بيتخرج من كلية الطب بنقول عليه دكتور، اللى بيتخرج من كلية هندسة بنقول عليه مهندس، اللى بيتخرج من كلية الحقوق بنقول عليه محامى، طيب اللى بيتخرج من كلية الإقتصاد و العلوم السياسية بنقول عليه إيه ؟ إيه اللى بيميزك عن باقة الكليات ؟ اللى بيميزك هو التفكير المنظم المنطقى و بالتالى الكلية تأثيرها مش مقتصر على دراستك بس، دى بتغير من طريقة تفكيرك و حياتك و بتفتحلك أفق جديدة.
هل اعجبك الموضوع :

تعليقات